Cynhaliodd Clymblaid Mentrau Cymdeithasol Cymru ei derbyniad cyntaf yng Nghynulliad Cenedlaethol Cymru ddydd Mawrth 24ain Ebrill. Daeth dros 90 o bobl yno gan gynnwys Gweinidogion y Cabinet a Gweinidogion Cabinet yr Wrthblaid, ac yr oedd yn llwyddiant mawr. 
Mae’r fenter gymdeithasol o Wynedd sy’n cynnig gwasanaethau garddio, arlwyo a gwaith saer yn dweud wrthym beth sy’n gyfrifol am lwyddiant y busnes, ac am ei chynlluniau i dyfu’r fenter ymhellach.
Darparu ar gyfer y dyfodol: bwyty Taste Academy
Dyddiad: 17.02.2012
Mae un o aelodau newydd WSEC yn helpu i adfywio’r Rhyl a darparu hyfforddiant a gobaith hanfodol i bobl leol.
Mae nifer ohonom wedi clywed am fwyty Jamie Oliver, Fifteen, yr academi i gogyddion sy’n hyfforddi pobl ifanc ddifreintiedig sy’n ddi-waith, yn y diwydiant arlwyo. Mae nifer o’r prentisiaid yn mynd yn eu blaenau i gael gwaith yn y sector a chwyldroi eu bywydau wedi iddyn nhw gael dysgu gan y pen-cogyddion.
Fis Ebrill diwethaf, gwelwyd menter gymdeithasol debyg yng Ngogledd Cymru o’r enw Taste Academy yn agor ei drysau mewn llecyn heulog ar bromenâd y Rhyl.
Cyflogwyd nifer o bobl leol mewn swyddi parhaol a chymerwyd 24 o brentisiaid hyd yma, 16 ohonynt wedi mynd ymlaen i hyfforddiant neu waith pellach.
“Mae’r academi’n chwarae rhan allweddol mewn uwchsgilio gweithlu lleol i ddiwallu’r galw am lafur a’r angen am sgiliau yn y diwydiant lletygarwch ac arlwyo,” medd Ali Thomas, rheolwr rhaglen Strategaeth Dinas y Rhyl, sydd y tu ôl i’r fenter. “Mae hefyd yn ffenestr siop a hynny’n cefnogi cynlluniau lleol i adfywio economi twristiaeth y Rhyl,” meddai.
Mae’r bwyty’n un o brif gynlluniau’r Rhyl o dan raglen ‘Strategaeth Dinasoedd’ llywodraeth y DU, a lansiwyd yn 2006. Nod y rhaglen yw mynd i’r afael â diweithdra ac anweithgarwch economaidd.
Cafwyd arian gan Lywodraeth Cymru ar gyfer adnewyddu’r adeilad a derbyniodd yr academi nawdd hefyd gan Dîm Gweithredu Camddefnyddio Sylweddau Conwy/Sir Ddinbych.
Bwyd lleol da
Hyd yn hyn, daeth dros 20,000 o ymwelwyr drwy’r drysau i fwynhau danteithion lleol a phrydau rhyngwladol mewn lleoliad ffasiynol a chwaethus a grëwyd gan y cynllunydd arobryn Jamie Alcock.
Rhannwyd yr academi’n ddwy ystafell: caffi hwyliog, a bwyty mwy ffurfiol, ac mae’n gweithio’n agos gyda phrosiect ffermdir Ymyriadau Cymunedol Cyfiawnder Cymru (CIJW) i ddod o hyd i fwyd lleol.
Treuliodd rheolwr y bwyty, David Mathias, 23 o flynyddoedd yn y fyddin yn rhedeg ystafelloedd bwyta i gannoedd o bobl, yn ogystal â bod yn gyfrifol am les.
Mae’r mudiad ieuenctid Rathbone Cymru, yn gyfrifol am ddod â hyfforddeion o sawl oed i’r academi - o CIJW, Canolfan Fenywod Gogledd Cymru a Choleg Llandrillo.
Mae’r prentisiaid yn mynd trwy raglen Marchnad Lafur Drosiannol (ILM) Cyngor Gweithredu Gwirfoddol Cymru i gael profiad gwaith a chyfleusterau NVQ a BTEC mewn nifer o feysydd, yn cynnwys paratoi bwyd, arlwyo a sgiliau busnes yn yr Academi.
Deilliannau llwyddiannus
Dywed nifer o’r prentisiaid fod yr academi wedi’u helpu i droi cornel yn eu bywyd. Daeth Joe, sy’n 27 oed, i’r prosiect pan oedd yn cael trafferth mawr dod o hyd i waith. Roedd ganddo ddiddordeb mewn coginio erioed a theimlai fod hwn yn gyfle da i ddysgu a datblygu sgiliau newydd.
“Roedd ganddo botensial yn y gegin a dangosodd fod ganddo allu canolbwyntio a sgiliau arwain a daeth yn oruchwyliwr cegin. Cwblhaodd Joe ei NVQ Lefel 1 mewn Paratoi Bwyd a Choginio, Hylendid Bwyd a Thystysgrif COSH ac erbyn hyn ef yw’r Prif Gogydd yng Ngwesty’r Antelope yn yr Wyddgrug,” medd Thomas.
“Mi wnaeth dod i Taste Academy newid fy mywyd, agor fy llygaid i’r byd arlwyo a lletygarwch a rhoi cefnogaeth i mi ddechrau mynd am yrfa go iawn,” medd Joe.
Wedi diwedd prysur i 2011, gyda phriodas gyntaf yr academi ym mis Rhagfyr, yn ogystal â phartïon Nadolig di-ri, mae’r fenter gymdeithasol yn dod i drefn yn 2012 ac yn edrych ymlaen at groesawu miloedd yn rhagor o bobl leol ac ymwelwyr drwy ei drysau.
